MITI I BURRIT ME KËPUCË NEW AGE nga Suzana Malaj

Suzana Malaj

MITI I BURRIT ME KËPUCË NEW AGE

Një ndjesi kolektive numerikë
si ndjeshmëri kolektive nga shtypja
e koduar në neurozat e qenies
i falet atij burri “me anime”
Krijohen turbulenca në peshore
tek ruhet miti i burrit
e bunkerët si breshka të ngrira
përcjellin fantazmat e fundit
Ulur paradigmës së djeshme
si rreth tryezës ku Krishti ka ngrënë
si falje deponuake i falen demonit
në rite të purpurta me grusht e me shenjë
Pushton ditën miti i burrit
si kolon i ardhur nga bota e vjetër
ndonjëherë vjen i veshur edhe si dandy
me revistë mode e këpucë new age.

Trembem e kodoj neurozat
ndjesisë kolektive të turbullt
që vjen e ngjizet epokës së re
që ende lëngon nga miti i burrit
Burrit – mit “me anime”
që “lind njëherë” në disa vjet
shpesh i veshur edhe si dandy
me revistë mode e këpucë new age.

MUGËTIRË

Fillimi i përtëritjes me fuqinë e diellit
pritje e paqartë dhe e turbullt
gjithë rrugët e shtigjet janë zënë
si rrugët e Halilit për të takuar Tanushën.
Tonaliteti i lartë
prodhon tinguj të shurdhët
e legjenda e përtëritjes
i përngjet agimit të mugët.
Mugëtirë edhe kjo ditë…
Errësirë…
Shtrëngatë…
Brenda vetes e përtej vetes
rrugë e zënë, e paqartë.
Përmbysja e madhe përmbysi çdo gjë
bllokoi traktin e tretjes
një fantazmë që i përngjet tellallit
ngjit përmbi shtyllë lajmërimin e vdekjes.
Një plojë…
Si plojë…
shoqëron mugëtirën
-Po çfarë thonë?!-Sa do zgjasë?!
-A do të çelën rrugët dhe shtigjet?!
Të diellzohen,
Të spërndriten
me fuqinë e ripërtëritjes
pa le të rrijë fantazma në rrugë
e le të ri vdesë së bashku me pritjen!

ENËRGJI E ERRËT

I madh është terri, i madh
si erë mes grimcash
e materia e zezë
po përhapet si mjegull
për të thyer valën e dritës.

I rëndë është terri, i rëndë
ngjizur brenda lëndës së errët
si ngjizja e djallit
fshehur për syrin si lëndë
me prekje të ftohtë e të akullt

Me puthjen e vdekjes
aq sa të ngrijnë kapilarët
në kapërthime hijesh tromboze
nga stepja e gjakut

Po mund, terri po mund
ta zhbëjë kuantin e dritës
pushton sinorët e shpirtit
me energjinë e errët të grimcës

Sa i pamat është terri,
i pamat… … … …
e drita rrezore si ushtri e mundur
po kthehet nga rruga e gjatë

Po kthehet, e mundur po kthehet
përplaset, përthyhet e meket
arrin mëngjesit me puthjen e dritës
që puth vetëm në bebëz.
… … … … …
Ndoshta është graviteti
ai që duhet parë
ku shtyhen e tërhiqen trupat
e materia e zezë
le të jetë sajesë
e marrëzisë që më erdhi me puthjet.

KUFIRI I ZGJIMIT

Kam vdekur disa herë
në mëngjes,
në mesditë,
në mbrëmje,
kam vdekur në gjumë
pa e kuptuar se kam vdekur
e jam pagëzuar gjendjes kufitare
të martesës së jetës me vdekjen
Teknikisht e vdekur
ku qafa e trurit më çmendet
e qelizat në një lloj oksitoni
lahen me ujin e vdekjes…
Tani nuk dua të vdes
dhe nëse është mëngjes,
mesditë
apo mbrëmje,
le të jetë dhe koha e shtënë në mes
prag mëngjesi
apo buzëmbrëmje
E nuk dua të vdes as në gjumë
e as kur të jem krejt e zgjuar
por kufirit të zgjimit nga ëndrra
që ëndrrën ma lë pambaruar
Si në një lojë letrash ku lë asin e zi
e asin e kuq marr në dorë
kur gjallimi bëhet fjalëkryq
e më fton të luaj në lojë…
Kur qeliza e vdekur merr frymë
e fryma më del e më merr,
në vise ku vdekja është thjesht një psikozë
me letrën e fshehur nën mëngë…
Si letra e fundit për fjalën e fundit
e si letra e parë për fjalën e parë
mençurisë që vjen dhe prej zemrës
e kalimit në një aks kufitar.
Se nuk vdes
e nuk kam dëshirë të vdes
mëngjesit,
mesditës
e mbrëmjes,
as kohës së shtënë në mes
në konet e retinës së syrit…
E nëse do vdes
do të jem neurozë,
qiparisit do t’i ngjitem nga degët
do t’i tund e t’i shkund të kuptoj se marr frymë
mëngjesit, mesditës e mbrëmjes.
E nëse nuk vdes
do të jem ekzistencë
kur ndahet e përndahet një atom,
çastit kur lë asin e zi
e asin e kuq marr në dorë.

AUTOSTOP

Që së largu
e prej së largu
e sa larg!!!
në trekëndëshat e fshehur të qiellit
orët ecin para dhe pas.
Kohëmatësi diku
në njërin nga trekëndëshat
ka nisur të bëjë autostop
e kohëmatësi këtu nis të çakordohet
e gjëmon si kambanat në kokë.
Që së largu
e prej së largu
e sa larg!!!
nga trekëndëshi i fshehur i qiellit
humbëtirës udhëton një sinjal.
E afrohet
nis të afrohet
duke qenë afër dhe larg
e botës së dheut kambana
gjëmon tri herë si kambanë.
E fryma
si bërthamë energjie
vlimit në pikën më të lartë
kohe çmendjes me akrepat e çmendur
gjëmon dhe ajo si kambanë.
E u tha se bota u çmend…
E u tha se fryma u çmend…
E u tha se qielli u çmend…
E nuk dihej cili ish’ më i çmendur
E nuk dihej cili ish’ më i kthjelltë.
E nuk dija në isha e çmendur,
kur binte kambana tri herë
autostopit në kohën pa matës
frymën para lindjes e kthej…
Që së largu
e prej së largu
e sa larg!!!
nga trekëndëshat e qiellit
bërë si trekëndësh
kohe çmendja u ndal
autostopit të çmendur
autostopit të radhës
me botën afër dhe larg…
Se qielli me dheun kohe çmendjes u ndanë
po sinjale dërgojnë ndonjëherë
atëherë kur dheut dëgjohet një kambanë
që gjëmon si kambana tri herë.
Që së largu
e prej së largu
e sa larg!!!

MES DY SKAJEVE

Realitetit që ma bën Zotin mendimin e parë
e njeriun mendimin e fundit
humba arsyen
pa e vajtuar për kushedi ç’ humbje
pa ia ndier mungesën – arsyes amorfe
që ia kisha frikën e rrjedhjes…
E rrodhi si llavë
botës së mos arsyes
duke lënë pas ndjesitë e djegura
e duke u tretur si rruga pa krye.
Krejt amorfe
krejt e patrajtë
më kujton për thelbin e hiçit
që zemrën ma ftoh e ma bën si kallkan
me ndjesinë e shpëtimit prej Krishtit.
Si në gjendje kllapie,
po lutem kllapisë
e rënduar nga thelbi i hiçit
që më ul poshtë e pastaj më ngre peshë
atje ku qiejt lëvizin
Me projeksionin për Zotin e ditur
e fyer nga thelbi i hiçit
me buzë murgeshe po lutem
duke bërë shenjën e kryqit
Po lutem, pa arsyen
që më rrodhi nga një qoshk
e që ndoshta e kish’ një arsye
me ndjesitë e djegura të një shpirti pa kokë
që vajton në rrugën pa krye
Marramendjes po lutem
pa qenë një murgeshë
në mesin e tërhequr të litarit
se në njërin skaj nuk ndihem migjen
e në tjetrin si murgeshë nuk jam falur
E mbetur pezull
me ndjesi pa arsye
me buzë murgeshe gjatë lutjes
me shpresën e zbehtë se arsyeja më vjen
shoqëruar me frikën e humbjes.

No Comments Yet

Leave a Reply

Your email address will not be published.