MALL IKJEJE nga Agim Bajrami

Agim Bajrami

MALL IKJEJE
(Kushtuar vajzës sime, Rominës)

Ti ke ikur
Dhe mua ajri s′më mjafton
Në gjoksin tim gjysmë të fikur
Pa gjumë shpirti rri gjer vonë.

Vërtitem shtratit ballëdjersitur
Pafund më ngjajnë këto netë idiote
Mua gjith′ ikjet më janë dhimbsur
Por jo kaq shumë sa ikja jote.

Dhe pse na thua se jam mirë
Dhe flet e qesh në telefon
Unë diejt prapë i shoh të ngrirë
Gjersa ti bijëz na mungon.

Çdo ditë më shumë diçka më dhemb
Sikur më shpon me kthetra djalli
Në trupin tim pa ndjerë zë vend
Një republikë me emër “malli”.

Me male ankthi në çdo metër
Dhe re që mbjellin shpesh furtunë
Në të s′do shihni njeri tjetër
Banor i saj jam vetëm unë.

Ti ke ikur,
Çdo vajzë prej ikjesh është krijuar
Qirinjtë e qiellit ngjajnë të fikur
Dhe unë veç natë shtrëngoj në duar.

No Comments Yet

Leave a Reply

Your email address will not be published.